Gure baratzeetan landatzeko ohiturarik ez izan arren, badira gurean oso ondo ematen duten hainbat landare. Lan gutxi eta emaitza onak ematen dituzten barazkiak direla azaltzen du Kimu Bat enpresako Aitziber Otegik.

“Exotikoak esaten diegu hemengoak ez direlako, baina kontuan hartu behar dugu baratzeetan edukitzen ditugun patatak, tomateak, porruak… ez direla, berez, hemengoak. Exotikoak ziren bere garaian”.

Adituak aipatu dituen barazkien artean daude physalisa, Zeelanda Berriko espinaka, cucamelon pepinoa, kakahuetea, meloia, sandia eta lufa izeneko kalabaza. Horiek guztiak orain landa daitezke, eta emaitza onak ematen dituzte gurean ere. Baratzerik ez badaukagu horietako batzuk loreontzietan sartzeko aukera ere badago.

‘Physalisa’ eta espinaka

Physalisa bola laranja bat da, berriki postreak egiteko erabiltzen dena. “Oso goxoa da. Orain landatzen da eta irailean hasten da ematen, eta ematen hasten denean asko ematen du”.

Espinaka, hemen, negukoa da, baina Zeelanda Berriko espinaka orain landatzen da. “Hilabete eta erdiko epean hasten da ematen, eta ez du batere lanik. Oso landare txikia landatzen da, baina metro bateko diametroa hartzen du”.

Pepinoa eta kakahuetea

Cucamelon delako pepinoa oso txikia da; igokaria, sarea ipintzen badiogu. “Balio du ozpinetan jartzeko edo baratzean ari garela gosetzen bagara zuzenean landaretik jateko. Goxoa da”.

Kakahuetea ere hazten da gurean. “Gutxik dakiguna da lur azpitik ateratzen dela. Ez dugu sekulako produkzioa lortuko, baina landare bakoitzak eskukada bat emango digu irailean edo urrian, orain landatzen badugu”.

Meloia, sandia eta ‘lufa’

Txikiak, akaso, baina meloia eta sandia ere ateratzen dira. “Lufa, berriz, kalabaza bat da, eta, heltzen eta sikatzen uzten badugu, dutxarako esponja natural bat lortuko dugu”, azaldu du Otegik.