Igandean –maiatzak 31– izango da Tabakorik Gabeko Mundu Eguna, eta, horren harira, kerik gabeko astea izan da maiatzaren azkenengoa.

EAEko datuei erreparatuz, 14-18 urteko nerabeen artean %20tik %18ra jaitsi da tabako kontsumoa 2023tik 2025era –nesketan zein mutiletan. Dena den, denbora tarte berean, zigarro elektronikoek gora egin dute; %13tik %20ra hain zuzen. Zigarro elektroniko horiek goranzko joeran jarraituko dutela diote aurreikuspenek.

Tabakismoa murrizteko programak

Tabakismoa murrizteko programen artean, Osasun Sailak eta Osakidetzak integratutako eta bultzatzen duten Kerik Gabeko Gazteak (KGG) aurki daiteke. Programaren helburua, ikasleak informatzea eta sentsibilizatzea da, tabako-produktuen kontsumoak eta nikotina aska dezaketen gailuen kontsumoak osasunerako dakartzaten arriskuei buruz. LHko 6. eta DBHko 1 eta 2. mailako ikasleei zuzendutako programa da KGG. Oraingoz, programan 44 ikastetxetako 3.709 ikaslek hartu dute parte.