Haur eta gazteei egokitutako euskarazko Wikipedia edo entziklopedia askea eskuragarri dago mugikorretan ere. CodeSyntaxen laguntzarekin moldatu dute eta Android eta iOSetan erabil daiteke.

2018an jaio zen Txikipedia; 8 eta 13 urte arteko gaztetxoei egokitutako lexiko eta sintaxiarekin egindako entziklopedia. “Euskara garbi eta errazean idatzita egotea da gure helburua, umeen eskola-beharretara moldatua, baina ulergarritasunari garrantzi handia emanez”, azaltzen dute proiektuaren atzean daudenek. Hots, Wikipediaren bertsio “laburtu” edo “errazagoa” dela diote, batzuetan Wikipediako artikuluak luzeak eta konplexuak izaten direlako.

2018tik hona, ia 3.000 artikulu sortu dira Txikipedian, eta orain, tresna ahalik eta “eskuragarri” eta “erabilgarrien” egiteko asmoz, mugikorretarako aplikazioa sortu dute. ¬†Aurreratu bezala, Android eta iOSetan erabil daiteke, eta Txikipediaren azalean bertan eskuratu daitezke deskargatzeko loturak.

Txikiek ere elikatu dezakete Txikipedia

Txikipedia wiki-proiektuan edonork parte har dezake, artikuluak idatziz, aldatuz, osatuz, informazioa gehituz edo zuzenduz; hala azaldu dute sustatzaileek. “Horretarako kontua ireki beharra dago, baina oso erraza da. Hori bai, beti errespetatu behar dira egile-eskubideak”, diote. Garrantzitsua da argibideak eta gidak jarraitzea.

Bestetik, sustatzaileen asmoa da 8 eta 13 urte haurrek ere haien aletxoa jartzea; hau da, Txikipedia osatzen laguntzea, haiek izatea interesatzen zaizkien artikuluak gehitzen dituztenak, betiere irakasleen laguntzarekin: “Horrela, euren ekarpena egin dezakete, eskolarako baliagarriak izan daitezkeen gaietan”.

Etiketak: