Era.eus egitasmoan udaberrian Nafarroan egiteko plan proposameak argitaratzen dituzte. Ideiak hartzeko aukera polita iruditzen zaigu eta gurera ekarri dugu argitaratu duten azkena. Maiatza jasotzen ikustea.


Hilabete berriarekin batera, egunak luzatzen dira eta naturak kolorez eta biziz betetzen du ingurua. Giro horretan, aspaldiko ohitura bat arnasberritzen ari da: Maiatza jasotzea.

Maiatza zutitzea udaberriari ongietorria emateko egiten den herri-ohitura da. Normalean, pago luze eta zuzen bat aukeratu, zuritu eta enborra tente jartzen da; naturaren berpizkundea, bizitzaren indarra eta komunitatearen batasuna sinbolizatuz.

Nafarroako hainbat eskualdetan bizirik mantendu da; hala nola Sakanako Iturmendi, Etxarri Aranatz, Bakaiku edo Ziordi herrietan, baita inguruko beste eremu batzuetan ere, Urbasa eta Andia mendialdeko inguruetan, hain zuzen. Herri askotan plazan zutitzen bada ere, toki guztietan ez da berdin egiten: hainbat lekutan zuhaitza ez da herrira eramaten, baizik eta bere jatorrizko ingurunean bertan zutitzen da.

Familientzat ohitura hau aukera paregabea izan daiteke belaunaldi desberdinak elkartzeko eta komunitatearen ohiturak ezagutarazteko. Haurrentzat ikuskizun ahaztezina izan daiteke,  elkarlana, naturarekiko errespetua eta tradizioekiko maitasuna modu naturalean transmititzeko erritua baita.

Hona familian egiteko egun osorako proposamen eder bat:

  • Goizean Sakanako natura ezagutu. Horretarako bi aukera oso desberdin baina paregabe daude. Batetik, Etxarri Aranazen Milurteko haritzen ibilbidea egin daiteke. Ibilbide honek baso giro berezia eskaintzen du, non haritz zahar eta handiak ikus daitezkeen, sekulakoak, etxeko txikienak aho bete hortz uzteko modukoak . Bestetik, Urdiaingo basoan aukera abenturazaleagoa bizi daiteke, Jentilen Leihoa edo Laieneko haitza izeneko harkaitzera igoera. Hemen ibilbidea pixka bat aldapatsuagoa da eta azken zatian harriak eta desnibel txiki batzuk daude, baina trukean paisaia ikusgarria eskaintzen du: ibarraren ikuspegi zabala eta naturarekin bat egitearen sentsazioa. Aukera hau egokiagoa da haur helduagoentzat edo mendian ibiltzeko ohitura gehiago duten familientzat.
  • Goiza naturan igaro ondoren, eguerdi ostean, Iturmendiko jaia bizi. Bertan, Maiatzaren ohitura ikusteko aukera dago; zuhaitza tente jartzen duten une berezia, giro herrikoia eta tradizioaren indarra transmititzen duena. Behin pagoa plazaren erdigunean tente mantentzen denean, auzate goxo batez eta dantza emanaldi polit batez gozatzeko aukera izanen da. 

Maiatza zutitzea ez da soilik iraganeko ohitura bat. Gaur egungo familientzat ere balio handiko erritu bilakatu da: gure sustraiekin konektatzeko, gure seme-alabei bertako esperientzia bat eskaintzeko, eta komunitatearen parte garela sentitzeko.

Horrelako irteera batek badu bere berezitasuna: naturatik herrira, tradiziotik festara, lasaitasunetik alaitasunera egindako bidaia txiki bat baita.

“Udaberriko planak” eranafarroa.eus-en artikulu sorta bat da, hau gustokoa izan baduzu, hemen kontsultatu ahal dira aurrekoak:

  1. Udaberriko planak I: mendia eta Peru-Harri
  2. Udaberriko planak II: ipuin-paseoak Estellerrian
  3. Udaberriko planak III: Kirola eta Natura
  4. Udaberriko planak IV: Kikilisalda
  5. Udaberriko planak V: Irulegiko Eskua