Bihar egingo da Loraldia Eskolaren 4. topaketa, Mondragon Unibertsitateko Humanitate eta Hezkuntza Zientzien Fakultatean, Aretxabaletako kanpusean. Jardunaldiak hezkuntza komunitateko eta kultura arloko profesional ugari bilduko ditu, galdera nagusi baten bueltan: Nola landu eskoletan euskal kultur transmisio estrategiak?. Ekimenaren xedea ez da soilik hausnarketa partekatua sustatzea, baizik eta “gaur egungo hezkuntza errealitatean aplikagarriak diren tresnak, bideak eta aliantzak identifikatzea eta partekatzea”.

Euskararen trasmisioa helburu

Loraldia Eskolaren ibilbideak eta helburuek testuinguru sendoa ematen diote topaketari. Egitasmo honen oinarria da euskaraz sortutako kultura garaikidea haur eta gazteen artean zabaltzea, haur hezkuntzatik batxilergora arte, eta hori eskola-orduetan nahiz curriculumean integratuta egitea. Antolatzaileen arabera, “transmisioa ez da eduki gehigarri bat, baizik eta hezkuntza proiektuaren parte izan behar du”. Horregatik, proposamenak malguak dira, ikastetxe bakoitzaren errealitatera egokitzeko diseinatuak.

Gaur egun, zazpi egitasmok osatzen dute eskaintza: Ttipia, Lorekolore, Airean, 7 Kantu, Lore Jokoak, Kamara Sartu eta Loreak Tailerretan. Programa horien bidez, adin tarte ezberdinetara egokitutako ekimenak lantzen dira, betiere “sormena, parte-hartzea eta euskararen erabilera aktiboa sustatzeko helburuarekin”” Helburu nagusien artean daude, besteak beste, euskararen erabilera indartzea, sormena piztea, euskal kulturarekiko atxikimendua lantzea eta adierazpen gaitasunak garatzea.

Ibilbideari dagokionez, datuek proiektuaren dimentsioa erakusten dute: 2017an abiatu zenetik, 29 ikastetxetan garatu da, 59 proiektu abiarazi dira, eta 2.600 haur eta gazte baino gehiago inplikatu dira. Gainera, 50 ikuskizun eta erakusketa publiko baino gehiago sortu dira. Antolatzaileek azpimarratzen dute “Topaketa hau ez dela ekimen isolatu bat, baizik eta urteotan eraikitako ibilbide baten jarraipena eta sendotzea”.

Jardunaldiko egitaraua

Bihar, maiatzak 8, egingo den jardunaldia bereziki zuzenduta dago ikastetxeetako zuzendaritza taldeei, irakasleei, normalizazio arduradunei eta kultur transmisioan lanean ari diren eragileei. Topaketaren balio nagusietako bat izango da profil ezberdinetako profesionalak elkartzea, elkarrengandik ikasteko eta sareak indartzeko helburuarekin. “Esperientzia praktikoak partekatzea eta ideiak testuinguru ezberdinetara eramatea funtsezkoa da”, nabarmendu dute.

Egitarauak ikuspegi praktikoa izango du ardatz. Lehen hitzaldian, Josune Zabalak hezkuntzarentzat euskal kulturak izan dezakeen “abiapuntu estrategikoa” aztertuko du, zuzendaritzaren eta klaustroen ahalduntzea azpimarratuz. Ondoren, Egoitz Urrutikoetxeak Seaskako esperientzia ekarriko du, “ikasleen hizkuntza gaitasuna indartzeko paradigma aldaketa” azalduz.

Bigarren blokean, Miren Oteizak eta Miren Basurtok Ikasgela kulturaz blaitu esperientzia aurkeztuko dute, eguneroko praktikatik abiatuta. Jarraian, Karmele Perezek eta Letizia Garciak HUHEZI Kulturala proiektua azalduko dute, “ikasleak kultur esperientzien parte aktibo bihurtzeko moduak” erakutsiz. Azkenik, Eneko Bidegainek, Idurre Alonsok eta Haizea Galarragak Kulturbide tresna aurkeztuko dute, “ikastetxeetako kultur praktiken diagnosia egin eta hobekuntza bideratzeko”.

Antolatzaileen esanetan, egitarauak hiru mailatan egiten du ekarpena: “marko estrategikoa eskaintzen du, esperientzia errealak partekatzen ditu eta tresna praktikoak proposatzen ditu”. Horrenbestez, biharko hitzordua “ez da soilik hausnarketarako espazioa izango, baizik eta praktika berriak aktibatzeko topagunea”.

Jardunaldia Loraldia eta Mondragon Unibertsitateko Humanitate eta Hezkuntza Zientzien Fakultateak antolatu dute, eta Bizkaiko Foru Aldundiaren babesa du.