Oso hedatuta dago Kanadako zenbait ikastetxetan; meditazio eta erlaxazio ariketak egiten dituzte ikasleek lehenengo orduan.

image

Christopher Lee irakaslearen gelan ez da egunik arnasketa ariketekin hasten ez denik. Lehen Hezkuntzako bosgarren mailako ikasleak ditu Vancouver herriko Renfrew ikastetxean eta arnasten ikasteko teknikak lantzen dituzte goizean goiz, egunero. Erlaxazio ariketa horiek MindUp izeneko programa pedagogikoan txertatuta daude. Kanada mendebaldeko ikastetxe askotan dago ezarrita programa.

MindUp programak enpatia, emozioen kontrola eta baikortasuna lantzeko ariketak ere hartzen ditu bere baitan. Helburua da ikasleen ongizatean eragina izatea, eta horrek eragin zuzena omen du emaitza akademikoetan.
Ikerketa zientifikoa

Urtarrilean ezagutzera emandako ikerketa zientifiko batek horrela ondorioztatu du. Lau hilabetez Kimberly Schonert-Reichl taldeko ikerlariek bi ikasle multzo behatu dituzte. Multzo batean MindUp programako ariketak egiten zituzten eta bestean ez. Emaitza izan da jarrera ez egokien kopurua txikitu egin dela ariketak egiten zituen ikasle taldean, eta ez horrela bestean. Halaber, ikasleek ongizate hobea erakutsi dute eta hobetu egin dira matematiketako emaitzak.

Patricia Morris irakasleak 25 urte daramatza irakaskuntzan eta bost erlaxazio eta meditazio ariketak aplikatzen ikasleekin. “Ikasleek azkarrago barneratzen dituzte zenbait kontzeptu eta sinistu ezina da zenbat atseginagoak diren euren jarreretan”, dio.

Kimberly Schonert-Reichl ikerlarik dio ariketek lagundu egiten dutela ikasleen kontzentrazio maila hobetzen. “Gertatzen da baita ere taldeko giroa hobetzen laguntzen dutela eta horrek berak ikasketarako giro hobea eragiten duela”, azaltzen du.

Renfrew ikastetxeko zuzendari Hugh Blackman-ek beste azalpen bat dauka. “Haurrak ikastetxera iristen direnean ez daude eskola karpetan. Datoz oraindik telebista, ordenagailu eta gainerako gailu elektronikoetako txiparekin. Ezinezkoa zaie eskolako zereginetan kontzentratzea”.

Erlaxazio eta meditazio ariketak ez ezik ikastetxean tai txi saioak ere egiten dituzte. Hamar minutuko saioak dira, dantza pauso erraz batzuk musika lasaiarekin lagunduta. “Tartetxo hori hartzen dugu guztiok sintonia berdinean jartzeko, eta badu maila sozial ezberdinetako umeen artean ematen diren ezberdintasunak malgutzeko gaitasuna. Orokorrean maila erosoagoko umeak lasaituta etortzen dira eskolara, ez horrela maila txikiagokoak. Urduri eta etxeko gorabeherak eraginda iristen dira. Denok hartzen ditugu hamar minutu eskolan gaudela barneratzeko”.

Albistearen eta argazkiaren iturria hemen.