Edoskitzea eta sustantzia toxikoak… Informazioa ‘e-lactancia.org’ atarian

Ustea da haurdun edo edoskitzen dagoen emakumearen elikadurak berezia behar duela, eta hortik abiatuta hainbat mito eta  beldur sortzen dira. Elikadura aditu Maite Garitanok uste du baztertu beharreko kontua dela hori. “Haurdun edo edoskitzen dauden emakumeen elikadurak beste guztion berdina izan behar du. Akaso arreta gehiago jarri beharko da puntu jakin batzuetan, baina gutxi batzuk izango dira”, esan du Bergarako Txapa irratiko Gurasoak saioan egindako elkarrizketan.

Gakoa elikadura ohitura osasuntsuak izatea dela dio Garitanok, eta haurdunaldian zein edoskitzean ohitura osasuntsu horiek mantentzea. “Gauza da elikadura ohitura osasuntsuak izatea eta hori lehenagotik landu beharreko kontua da”, esan du.

Alkohola eta tabakoa

Garitanok aipamen berezia egin du alkoholaren eta tabakoaren kontsumoari dagokionean. Amarena kontsumoari buruz aritu da baina baita ere ingurukoen kontsumoari buruz: “Zaindu behar dute amek eta baita ere inguruko gainerakoek ze eragin zuzena dute haurraren osasunean” esan du.

Elikadura ohitura osasuntsuei dagokienean bi ekintza kaltegarri direla azpimarratu du eta oso txertatuta daudela gure gizartean. “Kaltegarriak dira baina askotan beharrezkoak ez direnak neurriak hartzen dira”, ohartarazi du. Eta azalpena eman du: “Edoskitzen dagoen ama edaten edo erretzen hasten bada gehienetan alde batera uzten dute edoskitzea. Esnea ematen jarraitzea baino kaltegarriagoa izan daiteke neurri hori”, esan du. “Tabakoaren kasuan, esaterako, nikotina kopuru bat pasatzen da esnera baina oso gutxi. Gainera, amaren esne horrek dauzkan hainbat propietatek laguntzen dute haurra babesten tabakoaren ke horrek sor dezakeen arazoetatik. Hau da, alde berean, defentsa bat ematen dio”.

Alkoholarekin gauza berdina gertatzen dela dio Garitanok. “Askotan ama esnea ematea lagatzen dugu alkohola edatearren”, dio eta azaltzen du alkohola odolera pasatzen dela zuzenean, eta baita ere hesteetara. “Gomendioa da edoskitzea ez guztiz moztea, baizik eta ordu batzuk itxarotea”, dio Garitanok. “Badago formula bat hartzen duena kontuan amaren pisua eta kontsumitutako alkohol kopurua, e-lactancia.org (gazteleraz eta ingelesez) atari digitalean aurki daiteke.

e-lactancia.org

Edozein zalantza edukiz gero e-lactancia.org atari digitala gomendatu du Garitanok. “Oso gomendagarria da edoskitze garaian, batez ere sustantzia toxikoen, sendagaien kontsumoarekin lotutako kontsultak egiteko. Edoskitze aroan nola eragin dezakeen azaltzen du eta baita ere ze neurri hartu daitezkeen. Prestatuta dago, berez, osasun arloko profesionalendako baina oso ulerkorra da eta edozeinek erabil dezake”.