Etxean baratza izatea hezkuntza-jarduera garrantzitsua da, batez ere haurrentzat, naturarekin konektatzen eta hura errespetatzen eta zaintzen ikasten baitute. Baratza landatzeko, zaintzeko eta uzta biltzeko prozesuan sartzea oso onuragarria izango da haientzat. Baina sarritan ez dugu jakiten nola hasi edo eta zeintzuk diren hiri baratza egiteko jarraitu beharreko pausuak. Guzti honi erantzuna ematen saiatzen da “Baratza etxean”.

“Baratza etxean” webgunean, baratzaren inguruko informazio asko topa dezakegu. Alde batetik, hiri ortu bat nola egiten hasteko argibideak daude, nola aukeratu ontzirik egokiena, substratu edo lurraren inguruko argibideak edo eta akats ohikoenen bilduma.

Bestalde, gure baratzak babesteko intsektu onuragarriak eta kaltegarrien bilduma dago ikusgai, intsektu onuragarriek erakartzen dituzten landareen zerrendarekin batera.

Jarraian, bideo-tailerrak daude ikusgarri. Hauetan, hamaika barazki edo eta fruta landatzeko gomendio eta argibideak topa daitezke, bideo bitartez. Eta bukatzeko, baratza ahalik eta osasuntsuen daukagula ziurtatzeko, ereintza egutegi proposamena ere ikus daiteke, hilabetez hilabeterako gomendioekin batera.

Ekainera begira, esaterako, webguneak egun luzeei ahalik eta etekin gehien ateratzea gomendatzen du eta hurrengo ereintza proposamenak ematen ditu:

-Ekaineko ereintza babestua: 

Orburuak.

-Ekaineko zuzeneko ereintza:

Zerbak, apioak, alberjiniak, brokolia, kuiatxoa, azak, azaloreak, endibiak, marrubiak, ekiloreak, babarrunak, urazak, artoa, arbiak, luzokerrak, piperrak, porruak, errefauak, errefautxoak, erremolatxak, tomateak eta azenarioak.

-Ekainean birlanda ditzakezu:

Zerbak, apioa, alberjiniak, brokolia, kuiatxoak, kuiak, tipulak, azak, azaloreak, urazak, meloiak, luzokerrak, piperrak, porruak, erremolatxak, angurriak eta tomateak.

-Ekainean hauen uzta jaso dezakezu:

Zerbak, baratxuriak, kuiatxoak, tipulak, azaloreak, ziazerbak, marrubiak, ilarrak, babak, urazak, artoa, meloia, arbiak, patatak, porruak, errefauak, errefautxoak, erremolatxak, angurriak, tomateak eta azenarioak.

Informazio guztia “Baratza etxean” webgunean.