Yogurinha Borova eta Katxiporretako pailazoek 6 balore, 6 kolore, Bilbo MilaKolore egitasmoa gauzatu dute. Hiriko sei gunetan grabatu dituzte askotariko baloreak lantzen dituzten kantuak eta bideoklipak, eta hiriko zortzi eragilerekin batera gauzatu dute proiektua.

Pandemiaren erdian, Bilboko hiriaren dinamizazioa sustatzen duten espazio publikoko sormen eta kultura sektoreen proiektuetarako deialdia luzatu zuen iaz Bilboko Udalak, Bilbao Aurrera Planaren baitan. Ordutik, Yogurinha Borova eta Katxiporretako pailazoen proiektuak forma hartu du, eta gaur egun eskuragarri daude zazpi bideoklip.

Aldez aurretik iragarri gabe sei abesti eta dantza interpretatu eta grabatu dituzte Bilboko sei gune desberdinetan. Esan moduan, gizarte arloko sei balore eta sei kolore azaleratu dituzte, eta modu ikusgarrian, koloretsuan eta alaian aldarrikatu dituzte. Zazpigarren kantu-bideoklipa ere egin dute. Hain zuzen ere Maitasunaren ostadarra abestiarekin. Proiektuaren kolore eta balore guztiak batzen ditu.

Zazpi kantu eta bideoklip

1- Agur bat lagun maite kantua Doña Casilda parkean grabatu zuten Aspanovas elkartearekin. Elkartasuna lantzen du. Kolore gorria da.

2- Ausarten kluba Artxanda mendian egin zuten Naizen elkartearekin. Errespetua jorratzen du. Kolore laranja da.

3- Ahoa bizi, belarriak prest Uribarri auzoan grabatu zuten Uribarriko eskola publikoarekin eta Tanttaka Euskara Taldearekin. Euskara da lantzen duen balorea. Kolore horia da.

4 – Egurrezko ametsa kantu eta bideoklipa La Carolan grabatu zuten Deustu Arraun Taldearekin. Ekologia lantzen du. Kolore berdea da.

5 – Te camelo, Maite Zaitut Europa parkean grabatu zuten Kale Dor Kayiko elkartearekin. Kultura aniztasuna lantzen du. Kolore urdina da.

6 – Sentipenak askatu Miribilla parkean egin zuten Urretxindorra ikastolarekin eta EHGAM elkartearekin. Hezkidetza jorratzen du. Kolore arrosa da.

7 – Maitasunaren ostadarra Bilbon (EH) eta San Franciscon (AEB), grabatutakoa da. Yogurinha Borova eta Katxiporretako pailazoak Euskal Herritik eta Eneko Axpe Maisha musikaria AEBko San Francisco hiritik. Askatasuna da jorratzen duen balorea. Ostadarra da.