Haur txikiek infekzio gehiago izaten dituzte normalean nagusiagoek baino, eta esne gehien hartzen dutenak dira txikienak. Horregatik, mukien ekoizpena esnearekin lotu izan da urte askoan, baina baieztapen hori gezurra dela adierazi dute Espainiako pediatriako elkargotik.

Esnea funtsezko elikagaia da eta baita energia-iturri garrantzitsua ere. Ura, proteinak, karbohidratoak eta koipeak ditu. Gainera, kaltzioa, magnesioa, selenioa, fosforoa, B konplexuko bitaminak (B1, B2, B5, B6 eta B12) eta K, E, A eta D bitaminak ematen ditu, besteak beste.

Kaltzioa eta esnea

Esnea elikagaien kaltzio-iturri garrantzitsua da. Badira kaltzioan aberatsak diren beste elikagai batzuk, adibidez, almendrak edo espinakak. Baina esnez betetako edalontzi baten kaltzioa hartzeko, almendraz betetako edalontzi bat –kaloria-ekarpen handiagoarekin– edo ziazerba-kimuen ia poltsa oso bat hartu beharko litzateke.

Esnean dauden laktosa, kaseina eta D bitamina beharrezkoak dira kaltzioaren heste-xurgapena egokia izan dadin. Oxalatoek kaltzioaren xurgapena gutxitzen dute, horien edukia handia baita zerga eta ziazerbetan.

Kaltzioa funtsezkoa da hezurrak sortzeko eta, beraz, haurrak hazteko.

Infekzioak haurretan

Pediatren elkargoko datuen arabera, haur txikiek 6-8 infekzio izaten dituzte urtean eskolaurreko adinean, eta 5-6 infekzio urtean eskola-adinean, eta gutxitu egiten dira nerabezaroan. Kopuru hori handiagoa izan daiteke haur eskolara doazen edo anai-arreba nagusiak dituzten haur txikien kasutan.

Infekziorik ohikoenak katarroak dira, mukiekin eta eztularekin batera. Mukiak eta eztula arnas infekzioetatik babesteko mekanismoak dira.

Haur txikienak dira, infekzio gehien dituztenak, esne gehien hartzen dutenak, hain justu. Horregatik, mukien ekoizpena esne-kontsumoarekin lotu izan da.

Esne kontsumoaren eta mukien arteko lotura

Egin izan diren ikerketa batzuetan, esne-kontsumoaren eta mukien ekoizpenaren arteko erlazioa aztertu izan da, baina ez da lortzen emaitzarik esne-kontsumoak mukiak handitzen dituela edo katarro-sintomak okertzen dituela adierazten duenik.

Soilik frogatu da hesteetako mukositatea handitu dela esne-kontsumoarekin lotuta, baina hori ezin da arnas aparatura estrapolatu. Hesteetako mukositatea handitzeak digestio-sistemarako babes-funtzioa du.

Haur asmatikoek ez dute esne-kontsumoa murriztu behar, alergikoak ez badira behintzat. Horixe diote elkargotik.

Ondorioa

Esnearen kontsumoak ez du mukien eta flemen ekoizpena handitzen.

Esnea kaltzio-iturri garrantzitsua da, eta funtsezko elikagaia haurren elikaduran.