Ekoetxea ingurumen-hezkuntzako zentroen sarea da eta IHOBEk kudeatzen du. Gaur egun, Urdaibain, Meatzaldean, Txingudin eta Azpeitian ditu zentroak proiektu honek eta urtero 120.000 pertsonatik gora jasotzen dituzte. Natura eta biodibertsitatearekin lotutako jarduera eta proposamenak antolatzen dituzte, eta azaroan ere bada zertan parte hartu.

Urdaibaiko jarduerak

Azaroaren 5ean, 11:00etatik aurrera, perretxikoak bilatzeko ibilbidea eta inguruko lurretan dauden onddo motak ezagutzeko erakusketa ikusteko aukera izango dute familiek. 6 urtetik gorakoei zuzendutako jarduera da.

Egun berean, baina arratsaldeko bostetatik seietara, haurrentzako antzerkia egongo da. Potxin eta Patxin artistak baserrira egun pasa doaz eta, bide batez, ikusleak ere bertan sentiarazi nahi dituzte. Uneoro, erne eta adi egongo da ikuslea, mendi, baso eta zelaiek ematen digutenarekin ondo pasatuz ikastea baitu helburu saio honek. Animalien lagun izaten eta pakean uztearen garrantzia ikasiko dute. Gainera, jolastuz, baserriko eginkizunetan hartuko dute.

Igandean, Urdaibaiko artista, produktore eta eskulangileek egingo dute topo. Ingurunearekin inplikatutako eta konprometitutako ekitaldia da; baita pertsonen ongizatearekin ere, ondare kulturala eta esentzia transmititzeaz gain.

Jarduera guztiak doan dira, baina zapatuko jardueretarako info.urdaibai@ekoetxea.eus helbidera idatzita edo 946 87 0402 telefono zenbakira deituta eman behar da izena. Igandeko azokarako hemen eman behar da izena.

Meatzaldeko jarduerak

Azaroaren 5ean, 12:00etan hasi eta ordubetez, fosilak bilatzeko, ezagutzeko eta zer diren ulertzeko aukera paregabea izango dute sei urtetik gorako haurrek, modu praktiko eta dibertigarrian. Fosilekin esperimentatuko da, haien ezaugarriak ezagutzeko eta gure mendien sekretu geologikoak ezagutzeko.

Hurrengo egunerako, hilaren 6rako, Ahaztutako mineralen bila joku gidatua antolatu dute. Burdinaren ustiapenak ingurumenean zituen ondorioei buruzko pista eta enigma-joko dibertigarria da eta Ekoetxea Meatzaldeko inguruak ezagutzeko aukera emango du jolasak.

Doan da, baina izena eman behar da. Horretarako, info.meatzaldea@ekoetxea.eus helbide elektronikora idatzi behar da edo 946 05 12 75 telefono zenbakira deitu.

Txingudiko jarduerak

Azaroaren 5ean, 10:00etatik 11:00etara, bertako ingurunearen bilakaera historikoa kontatuko da eta orainaz nahiz etorkizunaz arituko dira.

Azaroaren 6an, aldiz, tinduak prestatuko dituzte 11:00etatik 13:00era, Ane Baztarrikaren eskutik. Ondoren, tinta horiek oihal eta paper gainean aplikatuko dituzte, eta estanpatu nahiz marrazki geometriko ugari margotzeko aukera izango dute parte-hartzaileek. Tailer honetan 8 urtetik gorako haurrek har dezakete parte.

Jarduerak doan dira. Izena emateko info.txingudi@ekoetxea.eus helbidera idatzi behar da, edota 943 61 93 89 telefonora deitu.

Azpeitiko jarduerak

Azaroaren 6an, 11:30etik 13:00era artoaren historia eta erabilerari buruzko tailerra egingo dute eta horrekin batera, taloak prestatuko dituzte. Eskuekin artaburuak aletuko dituzte, ale horiek nola ehotzen diren ikusi nahiz arto-irina eta ur epelarekin taloak egingo dituzte; ondoren, etxean kozinatu eta dastatzeko.

Azaroaren 13an, berriz, 10:00etatik 12:00etara, paper %100 birziklatua egiten ikasteko tailerra eskainiko dute. Tailer horretan, teknika ezberdinak erabiliz ekoiztuko dute papera.

Bi tailerrak doakoak izango dira, baina aurrez izena ematea komeni da info.azpeitia@ekoetxea.eus helbidera idatzita edota 943 81 24 48.