Familientzat baliagarria den aplikazioa kaleratu du Kalaka aholkularitza bulegoak: Emariapp, historiako eta gaur egungo emakumeak ezagutarazteko jolasa da. Jolasen bitartez, emakumeak egunerokotasunera ekartzea du helburu. Astelehenetik ostiralera, egunero, emakume erreferente baten bizitzaren pistak irakurrita, ezkutuko emakume hori nor den asmatu behar dute erabiltzaileek. Bost pista dira gehienez ere, eta minutu eta erdi du gehienez ere nor den asmatzeko. Erantzunetan lau emakumeren izen-abizenak eskaintzen dira. Egunen batean, jokoa egitea ahaztuz gero, lasai. Hilabete horretan egin gabekoak egiteko aukera ematen baitizu.

Hilabeteko sailkapena dauka eta ahalik eta pista gutxienekin denbora laburrenean asmatu behar dira galderak. Aleatorioa da, hortaz, pertsona bakoitzari egunero emakume ezberdin bat egokitzen zaio. Ginera, erabiltzaile guztien artetik zein postutan zauden ikus daiteke.

Gainera, erabiltzaileen jokuaren datu-basera gehitzeko emakumeen proposamenak egin ditzakete aplikazioaren bidez. Aplikazioan bertan, informazio atalean, emakumearen informazioa txertatu daiteke modu erraz batean. Oinarrizko datuak baino ez dira behar: izen-abizenak, jaioterria, jaioturtea, ekarpen nagusia eta lotura bat.

Emariak proiektuaren barnean

Emariak proiektuaren baitan sortu duten azken euskarria da Emariapp. 2018an Emariak liburua sortu zuten. Bertan, 10 emakume erreferenteren biografiak eta ilustrazioak jasotezn dira, baita bi kolektibo feministenak ere.

2020an, berriz, Emariak karta jokoa sortu zuten. 39 emakume erreferentek eta komodinak osatzen dute jokoa. Kartak hiru sailetan banatuta daude, eta multzo bakoitzeko hiru karta lortuta, emakume bakoitzaren argazkia eta biografia agertzen dira karta bakoitzean.