“Armairutik plazara” unitate didaktikoak
Hernaniko Udaleko Berdintasun sailak, Berdintasun Kontseiluarekin eta Hiruki Larroxa kooperatibarekin elkarlanean, ‘Armairutik plazara!’ izeneko unitate didaktikoak sortu ditu. Bertan, sexu aniztasuna eta tokiko LGTB+ errealitateak landu dituzte. .
Ibai Fresnedo Hiruki Larroxako kidearekin hitz egin dugu unitate hauen nondik norakoak ezagutzeko. Behar bati erantzunez sortutako egitasmoa dela esan digu, hezkuntza formalerako sortuak, baina edozein hezitzailerentzako baliagarrriak.
Unitate didaktikoak 2021ean argitaratutako ‘Noiz bukatzen da armairua? Hernaniko azken 50 urteko LGBT memoria’ lanean oinarrituta daude. Guztira, DBHn eta batxilergoan erabiltzeko sei unitate didaktiko sortu dituzte, unitate bakoitzak gai bat lantzen du: gorputza(k), identitatea(k), desira(k), justizia soziala, ahalduntzea eta memoria.
Hausnarketa kritikoa sustatzea helburu
Unitate didaktikoen helburua ikasleen hausnarketa kritikoa sustatzea da. Horretarako, zenbait jarduera proposatzen dituzte bertan, esku hartze aktiboarekin lotutakoak: «Sexu aniztasuna eta genero parekidetasuna lantze aldera, tratu onen defentsa eta justizia soziala sustatzen dituzten jarrerak eta jokabideak bultzatzea eta garatzea, parte hartzea, elkartasuna eta lankidetza eragiten dituzten jarduerak garatuz», azaldu dute.
‘Armairutik plazara!’ egitasmoa izen berdineko dokumentalean ere oinarrituta dago. Dokumentalak ZINEGOA jaialdian saria irabazi zuen eta postprodukzio fasean dago.
Argiak argitaratutako artikulua
Iruzkinik ez "“Armairutik plazara” unitate didaktikoak"