Apirilaren 27an ospatuko dute Bizipoza Jaia eta gertu dute egitaraua antolatzaileek. Motorrak berotzen joateko, bestalde, Badator Bizipoza Jaia antolatu dute Hernaniko ikastetxeek bezperarako.

Bizipoza komunitateak Hernaniko Biteri aretoa bete zuen asteartean. Bizipoza Jaia gero eta hurbilago dagoela gogorarazteaz gainera, egitarauaren aurkezpena egin zuten. Hernaniko Udala, Bizipoza Elkartea, Dobera Euskera Elkartea, Super H Elkartea, Gaztelekua, Pausoka elkartea, eta Kanika Aisialdi taldea izan ziren aurkezpena egiteko arduradunak. Totem eta Mitxelena (babesleak), Hernaniko boleibol taldea, eta Ttarla dantza taldeko trikitilariak eta dantzariak ere bertan izan ziren.

Porrotx eta Zapotxin aurkezle

Umorea izan zuen ardatz ekitaldiak, eta Porrotx eta Zapotxin pailazoek girotuta Ikusi mendizaleak abestia kantatuz eman zioten hasiera. Jarraian denona eta denontzat beharko
lukeen gizarte inklusibo bat eraikitzea aldarrikatu zuten sudu gorriek. “Euskal Herri osoko 38 elkartez osatutako elkartea da Bizipoza; denak, izaera bereziko gaiak lantzen dituztenak, eta haur eta familiek osatutakoak, hain zuzen. Helburua da denona eta denontzat beharko lukeen gizarte inklusibo bat eraikitzea, euskaratik eta euskaraz”.

Bizipoza elkarteko koordinatzaile Leire Elizegik esan zuen, bere aldetik: “Bizipoza elkarte izateaz gain komunitatea ere, bada. Ibilbide luzea egin dugu dagoeneko eta bide luzea dugu aurretik. Garrantzitsua ikusten dugu bidelagun izan ditugun guztiei gure eskerrik beroena aitortzea. Bizipoza Eskola gure bideko pauso potoloa izan da, zenbait proiektu pilotu eta gero indarra hartzen ari dena”.

Bizipoza tonbola

Elizegik amaitu ostean, Ai, Zapotxin abestia kantatuta, Dobera Euskara Elkartea aurkeztu zuten, Bizipoza tonbola antolatu baitute, Bizipoza ekitaldiaren egunerako. Doberako kideek jakinarazi zuten sari mordoa eskuratzeko aukera egongo dela tonbolan.

Super H Elkartearen txanda izan zen gero. “Gaitz larria edo onkologikoa duten umeentzako eta ikerkuntzarako laguntza elkartea da”»”, azaldu zuten. Opari bana eskaini zieten Porrotxi eta Zapotxini; paperezko txoria. Kondaira japoniar batek omen dio, horrela mila eginda bihotzean daramagun desiorik sakonena beteko dela.

Elkartearen helburuak azaldu ostean, Bizipoza elkarteak Super H elkartearekin elkarlanean sortutako Parke bat bideoklipa proiektatu zuten.

Erraldoien eta buruhandien bisita, Pausoka elkartearen Elkarrekin jolasten bideoa eta Bizipoza Jaiaren egitarauaren aurkezpena etorri ziren gero. “Guztiok disfrutatzeko jaia izango da. Denona eta denontzat! Beraz, animatu eta etorri jaira!”»”.

Kanika Aisialdi taldeak asmakizun korapiloa bota zuen. Apirilaren 27an emango dute erantzuna.

BIZIPOZA JAIA-EGITARAUA
ATSEGINDEGIN
. 10:30-14:30, Bizipozako elkarteen gunea.
. 10:30-14:30, Bizipoza jolasa.
. 10:30-14:30, Euskal tonbola, Dobera Euskara Elkartearen eskutik.
. 11:00, Go!azen-eko lagunen ikuskizuna.
. 11:30, Hernaniko erraldoi eta buruhandien konpartsa, herrian zehar.
. 11:45, Ttarla dantza taldearen emanaldia.
. 12:30, Hernaniko Musika Eskolako trikitilariak, herrian zehar.
. 12:45, Bizipozako elkarteei aitortza ekitaldia.
. 13:30-15:30, Paella jatea, Pausoka Elkartearen eskutik.
. 16:00, Zapotxin, Porrotx eta Marimototsekin irri, kantu eta dantza.
. 17:30, Merienda.
. 18:00, Itzal taldearekin erromeria.

URBIETA KALEAN
10:30-14:30, Kanika Aisialdi Taldearen, Aratz Ikastolaren eta Gaztelekuaren haurrentzako tailerren gunea.
12:00, Hernaniko Boleibol Taldearen hartubol erakustaldia.

BITERIKO PLAZAN
10:30-14:30, Bizipozako elkarteen tailerrak.
12:15-14:30, Hernani Burujaberen Altxorraren Bila.