Gure platera gure aukera-ren baitan dauden eskola, guraso elkarte eta bestelako elkarteak eskola-jantokien kudeaketa zentralizatuari alternatibak bilatzen ari dira; bailaran hiru dira: Elgetako Eskola eta Bergarako San Martin Eskola eta Ereindajan.

Ikastetxe publikoetako jangelen eredu berria eta sukaldeak eraikitzea, horiek eskatu dizkio Gure platera gure aukera (GPGA) plataformak Hezkuntza Sailari, beste behin. Urteak daramatza “eskola-jangela osasungarriago, hurbilago eta hezitzaileagoa” lortzeko lanean. Guraso elkarteek, hainbat sindikatuk eta elikaduraren barruan aldaketa sustatzen duten erakundeek osatzen dute. Debagoienean, Elgetako eskola eta Bergarako San Martin Eskola daude egitasmoaren barruan; baita Bergarako Ereindajan ere. 2000 ezkero “berritu ez den araudia” dago, kudeaketa zuzena deritzon aukera eskaintzen du soilik. Eredu horretan, catering enpresa handiek kudeatzen dituzte ikastetxe publikoetako jangelak.

San Martinen kasuan, badu sukaldea, eta catering enpresak kudeatzen du, baina kudeaketa-eredu alternatiboa izateko eskaera egina du, eta jangela tokiko nahiz sasoiko elikagaiekin hornitzea aldarrikatzen du. Ainhoa Narbaiza Ereindajaneko kidea da eta azaldu du 2021ean aurkeztu zutela eskolak, guraso elkarteak eta Ereindajanek beste planteamendu bat Jaurlaritzan: “San Martin Eskolan ematen ziren baldintzak aldaketa prozesua martxan jartzeko, eta bere unean landutako proiektua aurkeztu genuen. Momentuan jaso genuen erantzuna izan zen arau- di osagarria martxan dagoenean baloratuko zela, bitartean ezingo zela. Hezkuntza Sailetik gutun ofiziala bidali zuten eskolara eta ordutik ofizialki ez da beste erantzunik eman, nik dakidala”.

Sukaldea berritzeko eskaera

Elgetako eskolan, berriz, dagoen jantoki-eredua garraiatua da; janaria eginda jasotzen dute, eta eskolan berotu eta banatzen da: “Oraingo jantokiak ez du sukalderik. Halere, eskolako azpiko solairuetan dagoen aretoak baditu berritzeko beharra duten sukalde eta jantokia”. Hori martxan jarri nahi dute in-situ eredura pasatzeko: “Prozesua Eskola Kontseiluan aurkeztu eta onartu da; Hezkuntza Sailean ere azalduta dago. Sukaldearen proiektuaren lanketan murgilduta gaude. Udala, jantokiaren gaiarekin, herri mailako proiektu gisa konprometituta dago eta udal-programan jasota dauka”.

Aurrera begira “familiek euren seme-alaben elikaduraren inguruan duten kezkan oinarrituta”, bertako elikagai eta garaikoekin janaria prestatzeko aukera izan nahi dute: “Eskolan Hamaiketako Osasungarria proiektua eta beste hainbat sentsibilizazio-ekintza martxan ditugu. Baina pausoz pauso goaz. Guztia martxan jartzeko, Elgetako Eskolako Jantoki Eraldaketa Batzorde bat dugu, Udaleko ordezkariek, gurasoen ordezkaritzak eta eskolako ordezkaritzak osatzen dutena”.