Azken urtetan, geroz eta gehiago hitz egiten da haurrari autonomia emateari buruz. Baina garrantzitsua da desberdintzen jakitea, haurrari utzi behar zaion autonomia, batzuetan ematen zaion askatasunarekin.

Izan ere, Berritzegune Nagusiko Haur Hezkuntzako kolaboratzaile Nere Indaren esanetan, eragina izango du haurrari ematen zaion garapeneko autonomia horrek, umearen nortasunaren eraikuntzan.

Gaur egun, geroz eta ohikoagoa da haurrari autonomia handiagoa eskaintzea, baina Indaren ustez, batzuk, autonomia, askatasun absolutuarekin nahasten dute. Haurra ez da gauza askotan guztiz independentea izango, baina gauza batzuetarako autonomo izaten uztea ere, inportantea da.

Garapeneko autonomiaren bitartez, bizipenetatik ikasiko baitu txikiak, halaxe adierazi du Indak: “Azkenengo hamarkadetan erakusten zitzaigun kanpotik barrura, hau da, pertsona batek esaten zizun, zuk zer jakin beharko zenukeen. Eta prozesua da alderantziz; da zuk bizi izan duzun zerbaitetik, dituzun sentsazioetatik, dituzun harremanetatik, daukazun segurtasun afektibotik… sortzen dena. Horrek guztiak eragin zuzena dauka zure autonomian eta zure ibilbidean. Eta horrek egiten du zu benetan jabetzea inguratzen zaituen horrekiko”.

Horrez gain, “arduratsu” ere egiten zaituela gaineratu du Indak: “Zu autonomoa zarenean, arduratsua zara, zuk erabaki duzulako zerbait, eta orduan zuk jasotzen dituzu ondorioak, erabaki duzun horrekiko. Eta kanpotik norbaitek zerbait egiteko esaten dizunean, ez da zure ardura, beste horrek esan dizuna egiten ari zara”.

Gaur egun hainbat kasutan sustatzen den haurren jolas librearekin eta eremu libreekin ere izango luke lotura horrek guztiak. Aldi berean, kasu horietan, hezitzaileek duten inportantzia ere azpimarratu du Indak: “Nik utzi zaitzaket libre zuri jolasean, baina askatasun hori izan daiteke absolutu bat, horrek dakar mugarik ez edukitzea, eta guztiok behar ditugu arau edo muga batzuk”.

Esan du baita ere, egia dela norberak eta eskolak berak eskaini behar diola bizirik dagoen ekosistema bat umeari, manipulaziotik, esperimentaziotik, harremanetatik, zaintzatik… ikas dezaten. Autonomia zer den ulertzea askotan “kosta” egiten baitzaigu heldu bezala.