Gernikako Allende Salazar eskola publikoan bi hilabete daramate jantoki eredu berriarekin. Irailean ipini zuten martxan, eta hasierako kalkuluak 610 erabiltzailerentzako egin bazituzten ere erabiltzaile kopurua igo egin da. Gaur egun 650 dira.

14199356_544553422406287_817407273269832060_n

Aurreko jantoki ereduarekin bezala ikastetxeko sukaldean prestatzen dituzte jakiak orain ere. Aldea da tokiko eta garaiko produktuak erosten dituztela, eta ekologikoak. Guraso elkarteak dihardu aldaketa gidatzen eta elkarteko kide Dabid Zelaia-Zugadik azaldu duenez aldaketa handiena kalitatean eta egiteko eran dago. “Etxeko bazkariaren askoz ere itxura handiago dauka orain jangelakoak. Elikagaiak hemengoak dira, garaikoak eta sukaldariek mimo handiarekin prestatzen dituzte”. Hemen informazioa gehiago.

Ekoizleak badaude

600 erabiltzailetik gora ditu Allende Salazar ikastetxeko jangelak. Hasierako beldurretako bat izan zen ea eskaerara egokituko ziren ekoizleak aurkituko zituzten. “Pausoz pauso mito batzuk apurtzen joan gara”, adierazten du Zelaia-Zugadik. “Ekoizleak izendatzeko lehiaketa antolatu genuen eta orduan konturatu ginen bazegoela nahikoa eskaintza”. Adibide bat ematen du Allende-Salazar ikastetxeko gurasoak: “Zentro handia gara eta zuek ideia bat egiteko jangelan arraina dagoen bakoitzean ehun kilo arrain ekartzen digute. Fakturazioa ere oso handia da eta dena gelditzen da hemen”.

Taldeka antolatu zituzten elikagaiak. “Barazkiak eta fruta inguruko bost baserritik ekartzen dizkigute. Elkarte bat sortu dute eta koordinatzaile bat dute. Ekartzen dizkigute baita ere zerealak eta lekaleak. Kanpotik erosten dituzte hemen ez dago-eta. Kanpotik datoz baita ere platanoak, mandarinak… baina guztia da ekologikoa eta kooperatibei erosia. Bost baserri horiek arduratzen dira”. Sekretua zein den galdetuta Zelaia-Zugadik barre egiten du: “Guk ez dugu diru-irabazi asmorik. Hala, elikagai bakoitza %20-30 edo 40 gehiago ordain dezakegu. Aurrekontuko diru gehiago bidera dezakegu elikagaietara”.

Informazioa partekatzeko gertu

Hainbat dira jangela eredua aldatzeko bidean dauden ikastetxeak. “Ikastetxe kontzertatuetan batez ere”, dio Zelaia-Zugadik. “Ikastetxe publikoetan ezin da; ez dago baimenik. Programa pilotu batean sartu ginelako eman dugu guk pausoa”. Dena den, pausoak ematen hasteko gomendioa egiten dute Allende-Salazar ikastetxetik. “Egin daitezke gauzak, nor bere burua prestatzen hasi esaterako. Proiektu pilotu honek bi urteko iraupena izango du. Garrantzitsua da ahal denik eta indartsuen heltzea irteera puntu horretara. Eredu aldaketa egin nahi duten ikastetxe publikoak horretara animatu gura ditugu”.

Hezkuntza Sailari askatasuna eskatzen diote zentro bakoitzak aukera izan dezan zein jantoki eredu gura duen erabakitzeko. “Gure kasuan autogestioa aukeratu dugu, baina beste batzuk akaso katering zerbitzua aukeratuko dute. Orain ez dago aukera hori, erabakita dator”.

Interesa badagoela sumatzen dute Allende-Salazar guraso elkartean. “Hitzaldiak ematen ari gara. Lehendik ere bazegoen interesa baina bi urteotan hazi egin dela esango nuke. Gu, gainera, esperientzia hau guztia sistematizatzen ari gara atzetik datozenei laguntza eskaintzeko. Informazioa partekatzeko gertu gaude hutsetik has ez daitezen, eta programa informatiko bat erosi dugu zeinek datu base sistema bat duen. Gure helburua ez da soilik gure esperientzia ondo ateratzea baizik eta interesa dutenei dugun informazioa pasatzea. EHIGEren laguntzarekin ari gara hori guztia artikulatzen”.