Mireia Alberdi: “Jatorduetan, pazientzia, eredu izatea eta umorea beharrezkoak dira”

Haurrak gaizki elikatzen dira?Gaizki hitza, agian, ez da egokiena. Eta gai batzuetan orokortzea ere ez da egokia. Baina gaur egun sumatzen da umeen elikaduran badaudela akatsak. Batzuetan larriagoak eta beste batzutan ez horrenbeste. Nork onartu nahi du bere umea ez duela ondo elikatzen?

Zein da dieta aproposena?
Ahalik eta gutxien manipulatutako jakiak erabiltzea komeni da. Beraz, bertako eta garaiko jakiak erabili eta etxean prestatu, 4, 5 edo 6 jatordutan banatuta. Barazkiak, frutak, lekaleak eta zereal integraletan oinarritutako elikadura. Ez ahaztu, fruitu lehorrak ( frijitu gabeak) eta koipe gutxiko esnekiak. Animalia jatorrizko jakiak gutxitu, gehiegi jaten ditugu azkenaldian…

Kantitateak ere zalantzak sortzen ditu; zein da kopuru onena?
Kopuru konkretu batzuk ematea zaila da, orokorrean. Ume bakoitzak oso behar desberdinak izan ditzake…

Askotan, jatorduak eramanezin bihurtzen dira guraso askorentzat; zer gomendatuko zenieke?
Pazientzia, eredu izatea (umeei barazkiak ipini eta gu arroza jateak ez du balio), umore ona eta eurak txikiak zireneko garaiak gogoratzea. Batzuen ustez, inoiz ez da derrigortu behar. Baina noski, plater bat ez badu jaten (goserik ez duelako, gustuko ez duelako…), ez da komeni beste zerbait eskaintzea horren ordez. Behin jaten ez badu ez zaio ezer gertatuko. Gero, agian, badira beste kasu batzuk gurasoek esaten dutena: “Ez du deus jaten”. Hori horrela den konprobatu behar da, eta, horrela bada, irtenbiderik egokiena bilatu.

Eta gozokiak noiz?
Nire iritzia horretan oso zorrotza da. Eta agian, jende gehienak ez du ulertuko, baina uste dut ez zaiela eman behar. Egia da bizi garen gizarte honetan hori oso zaila dela. Baina guk guraso bezala ez dut uste eman behar diegunik, eta ematen badiegu,  ahalik eta litxarkeria gutxien ematen saiatuko gara.

Elkarrizketaren iturria: Goiena.