Udazkenarekin batera, arnas infekzioak etxeko-txikien eta gurasoen egunerokotasunaren parte bihurtzen dira. Haurrak dira kaltetuenak, katarro sinpleenetik hasi eta bestelako gaixotasunak harrapatzen baitituzte. Hortaz, mukiak ere ugaritu egiten dira.

Leire Azpiazu erizaina bere sare sozialetan mukiez aritu da. Dioenez, mukiak edukitzeak sudurra ondo funtzionatzen ari den seinale da, modu horretan, birikak babesten dituztelako; mukiek infekzioak sor ditzaketen partikula txikiak harrapatzen baitituzte, eta, horrela, ez diete uzten horiei biriketara heltzen.

Hala ere, mukien garbiketa gomendatzen du. Txikienek zintz egiten ez dakitenez, mukiekin deseroso senti ez daitezen, garbiketa nasalak egin behar direla azaldu du, ahal den guztietan. Aldiz, mukien aspirazioak hain sarri ez direla egin behar dio, Espainiako Pediatria Elkarteak egunean behin edo bitan egitea gomendatzen baitu, asko jota.