Botere harremanei uko egin behar zaiela uste du Nerea Mendizabalek. “Botere harremana erabil dezakegu besteen gainetik jartzeko eta oso tentagarria da; izan ere, guraso edo hezitzaileok badugu autoritate figura horretatik. Gero, gainera, badugu indar fisikoa zein psikologikoa edo emozionala horretarako. Beste arazo bat izaten da botere hori galtzea eta umea jartzea gure gainetik. Nire ustez botere hori ez da ez eraginkorrena ez lagungarriena”.

Mendizabalen esanetan badago berezkoa dugun botere hori beste modu batean erabiltzeko aukera. Gure indarra haurrak duen indarrarekin bateratzea proposatzen du. “Gainetik beharrean, elkarrekin erabiltzea da nire ustez erronka”, dio.

 

Umearen bizitza proiektuan bidelagun

Gizakia jaiotzen denean deseinatuta dago behar duen guztia garatzeko Mendizabalen esanetan. “Kontua da haurtzaroan helduarekiko menpekotasuna dagoela; izan ere, laguntza bat behar izaten da. Baina berez potentzialitate guztiarekin jaiotzen da umea orduan gure lana ez da ezer jartzea baizik eta dakarren hori argiztatzea edo loratzen laguntzea. Eta batzuetan ez dugu konfiantzarik umeak erabaki onak hartuko dituela, baina nork bere bidea egin behar du eta akatsetatik ere ikusi egiten da”.

Haurrak atxikimendu segurua behar du eta horrek eskatzen du umeak ikustea baduela eta merezi duela erreferente duen heldu horren arreta. Balio duelako, merezi duelako… Nola helarazten da hori? Mendizabalen esanetan haurraren beharrak kontuan hartuta, beti.

Autonomia esparruak eskaini

Haurrak aldarrikatu egingo du autonomia hori ia hasieratik. “Kontua da eskaera hori nola kudeatzen dugun pizten zaion une horretan. Askotan gertatzen da kontrakoa; guk nahi dugula umeak modu autonomoan funtzionatzea eta auskalo zein arrazoirengatik une horretan ez duela nahi”.

Atzerapausoak ere ematen direla ohartarazi du Mendizabalek. “Anai edo arreba baten jaiotzarekin, esaterako. Horrelakoetan ume batzuk atzera moduan egiten dute autonomian, eta gurasoek ulertu behar dute une horretan akaso beste behar batzuk dituela. Behar du arreta, eta gurasoen denbora segurtasuna berreskuratzeko”. Horrelako uneak atzerapauso moduan ulertu beharrean inpultsoa hartzeko direla uste du adituak.