Abenduan argitaratu zuen Kokoriko Hezkuntza Faktoriak K@ntu K@ntari CD-liburua. Bilduman Aiaraldeko istorio eta kondairetan oinarritutako abesetiak batu dituzte, eta liburua erabili dute kantuak testu eta ilustrazioekin azaltzeko. Aritz Lilik azaldu du proiektua.

Zer dela eta animatu zarete halako lana egitera?

Aspalditik geneukan asmoa. Eskualdeko istorioak, ondarea, haurrekin eta familiekin lantzea nahi genuen, eta interesgarria iruditu zitzaigun hori musikaren bidez egitea. Hala, Aiaraldeko herri bakoitzeko abesti bat egin dugu eta testuinguruan jartzeko testu batek eta ilustrazio batek laguntzen diote. Dena dela, CD-liburua proiektu handiago baten lehenengo pausua da.

Hortaz, orain zer?

Orain, gure asmoa bi bide hartzea da. Alde batetik, ikastetxeetan lantzeko gida didaktiko batzuk sortzea da gure asmoa, eta bestetik, ikuskizun bat sortzea ere badugu buruan. Garbi ikusi dugu eskualde honek milaka gauza dituela kontatzeko, eta horiek familiei kontatzen eta zabaltzen jarraitu nahi dugu.

Nola bihurtu dituzue istorioak abesti?

Esan bezala, herrietako ondarea batu eta abesti modura zabaldu nahi izan dugu; hau da, ez dira kantu zaharrak, berriak asmatu ditugu. Abestien letrak Izar Mendiguren bertsolariak sortu ditu, eta doinuak Igon Olaguenagak eta Egoitz Uriartek konposatu dituzte. CD-ak hamar abesti jasotzen ditu (bat herri bakoitzeko eta Arimen gauari lotutako beste bat). Eta liburuan, abestien testuingurua azaldu nahi izan da testu eta ilustrazio bidez; benetako istorioaren zertzelada batzuk ematea nahi izan dugu, hartzailea kokatzeko.

Nolako gaiak edo istorioak dira?

Orozkori dagokion abestian adibidez, kirikiñausien inguruan aritu gara. Gaztainak gordetzeko erabiltzen diren halako asko daude Orozko aldean, eta gaztainaren eta gaztainondoaren inguruko lanketa bat egin dugu. Baina bildumako gaiak askotarikoak dira: natura, mitologia, pertsonaia ezagunak, historiari erreferentziak…

Dagoeneko iritziak ere jasoko zenituzten…

Bai. Harrera oso ona izan du. Musika erabiltzean asmatu dugula esan digute. Haur askok Gabonetako oporretan izan zuten abestiak entzuteko aukera eta ikaragarri gustatu zaizkie; baita gurasoei ere! Eta hori zen, hain zuzen ere proiektuaren helburua: ondarea txikiei transmititzea, baina helduek ere gozatzea.

Etiketak: